Врховниот суд на САД, каде конзервативните судии имаат мнозинство, денеска ја укина смртната казна на маж од државата Оклахома и нареди повторно судење, барање кое беше поддржано не само од одбраната на обвинетиот, туку и од обвинителството.

Ричард Глосип, кој сега има 62 години, беше прогласен за виновен и осуден на смрт за наводно ангажирање платен убиец да го убие сопственикот на мотел каде што тој бил менаџер во 1997 година. Врховниот суд денеска не ја засноваше својата одлука на критериумот за невиност на Глосип, туку пресуди дека тој има право на „фер судење“.

Судиите ја поништија одлуката на понискиот суд во Оклахома со која беше потврдена смртната казна на Глосип, иако тој тврдеше дека обвинителите криеле информации што можеле да и помогнат на одбраната. Републиканскиот јавен обвинител на Оклахома, Гентнер Драмонд, се согласи со барањето на Глосип и ја поддржа неговата жалба.

Тројца конзервативни судии (врховниот судија Џон Робертс, Брет Кавано и Ејми Кони Барет), како и тројца прогресивци, се согласија со барањето. Двајцата најконзервативни судии, Кларенс Томас и Семјуел Алито, се спротивставија. Конзервативниот судија Нил Горсуч не учествуваше, очигледно затоа што се занимавал со овој случај кога служел во понизок суд.

„Заклучуваме дека обвинителството ја прекршило својата уставна обврска да ги исправи погрешните сведочења“, рече прогресивната судијка Соња Сотомајор, изразувајќи го мнозинството од Врховниот суд.

Бери Ван Триџ, сопственикот на мотелот, беше убиен од неговиот 19-годишен вработен Џастин Снид. Последниот, кој бил зависник од метамфетамин, бил осуден на доживотен затвор откако се изјаснил за виновен и го посочил Ричард Глосип како поттикнувач, тврдејќи дека му дал 10.000 долари за да го изврши делото. Глосип призна дека му помогнал на Снид да го прикрие злосторството откако било извршено, но сепак негира дека знаел дека 19-годишникот планирал да го убие шефот или дека го охрабрил да го стори тоа.

Додека бил во затвор, на Џастин Снид му било дијагностицирано биполарно растројство и му бил препишан литиум. Но, кога сведочеше на судењето на Глосип, лажеше, тврдејќи дека никогаш не се консултирал со психијатар. Обвинителите тогаш не го коригираа, како што требаше.

Барањето за второ судење беше поддржано и од државниот јавен обвинител Герднер Драмонд, исклучително редок настан. Меѓутоа, во 2023 година жалбата беше отфрлена од Апелациониот суд во Оклахома. Обвинителот и бранителите потоа заеднички поднесоа жалба до Врховниот суд, кој го одложи извршувањето на Глосип (беше закажано за мај 2023 година) и се согласија да го сослушаат за случајот.

Егзекуцијата на Ричард Глосип досега беше закажано девет пати. Всушност, во три од нив егзекуцијата била прекината додека осуденикот веќе го изел „последниот оброк“.