Неодамнешниот играч на ПСЖ, кој минатата сезона ја помина на позајмица во Јувентус, Леандро Паредес (29), и официјално стана нов-стар фудбалер на Рома, потврди клубот на својата официјална веб-страница.

Аргентинецот го носеше дресот на римскиот клуб од 2014 до 2017 година, а сега потпиша договор со „волчицата“ до 30 јуни 2025 година. Во Рома доаѓа како замена за Немања Матиќ кој одлучи да ја продолжи кариерата во францускиот Рен.

– Би сакал да им се заблагодарам на навивачите што ме пречекаа во Рим. Се вратив во Рома поради навивачите. Тоа е клубот во кој ја започнав мојата кариера во Европа. Минатата година беше неверојатна за мене, бидејќи го освоив Светското првенство со Аргентина. Сакам да продолжам со успесите и верувам дека можам да го постигнам тоа со Рома – изјави Паредес, а пренесува официјалниот сајт на Рома.

Да потсетиме дека Паредес порасна во Бока јуниорс, а потоа играше за Киево, Рома, Емполи, Зенит, Пари Сен Жермен и Јувентус.

За репрезентацијата на Аргентина дебитираше во 2017 година, од кога одигра 54 натпревари и постигна пет гола.

🤝 Bentornato, Leandro! 🟡🇦🇷🔴#ASRoma pic.twitter.com/6UUNBbn8xe

— AS Roma (@OfficialASRoma) August 16, 2023