Холандските археолози открија локалитет со мегалитски споменик стар околу 4.000 години, кој го нарекоа „Стоунхенџ на Холандија“, пишува „Саенс алерт“ (Science alert).

Истражувањето околу таканареченото „светилиште на отворено“ започнало во 2017 година во малото село на околу 50 километри од Утрехт, а резултатите од долгогодишните истражувања беа објавени  средата. На локалитетот се пронајдени три гробници каде главната гробница со дијаметар од 20 метри служела како соларен календар.

Погребната тумба, која содржела скелети на околу 60 мажи, жени и деца, имала неколку премини низ кои сончевите зраци директно преминувале во најдолгите и најкратките денови од годината.

Археолозите велат дека ридот на кој се ископувало потсетува на Стоунхенџ, добро познатиот мистериозен праисториски споменик во Британија, каде што исто така се случува овој феномен поврзан со најдолгиот и најкраткиот ден од годината.

Меѓу останатите артефакти на овој локалитет, во еден од гробовите пронајдено е едно стаклено зрно, за кое по анализата се покажало дека потекнува од Месопотамија, денешен Ирак.