Продукцијата на серијата „Томб Рајдер“ (Лара Крофт) на „Амазон Прајм“, вредна 120,5 милиони евра, е во паника откако главната актерка Софи Тарнер го повреди грбот на сетот. Снимањето во студиото „Шепертон“ е прекинато за еден месец откако 30-годишната ѕвезда од „Игра на тронови“ ја обнови претходната повреда, а постојат стравувања дека на Софи ќе ѝ требаат дури шест месеци за закрепнување, пишува „Дејли мејл“.

Тарнер ја презеде иконската улога по Анџелина Џоли и Алисија Викандер и повеќе од една година се подготвуваше за тешките каскадерски сцени. Бидејќи голем дел од серијата е веќе снимен, продуцентите се во паника бидејќи замената на актерката во оваа фаза би била исклучително тешка задача.

„На сетот владее хаос и целото шоу е во опасност. Софи целосно се внесе во улогата, но бруталните физички барања за ликот на Лара Крофт беа премногу за нејзиното тело“, вели извор за „Сан“.

Многумина стравуваат дека таа воопшто нема да може да се врати на време, што создава огромна главоболка за тимот.

Самата актерка претходно откри дека за време на подготовките сфатила дека има хроничен проблем со грбот.

„Трениравме по осум часа дневно, пет дена во неделата. Сфатив дека имам постојан проблем, но и дека е многу полесно да се изградат мускули ако некогаш во животот си вежбал, што кај мене не беше случај“, изјави Софи.

Таа додаде дека годините глумење во „Игра на тронови“ не ѝ помогнале за оваа улога, бидејќи таму била „кул кралицата“ која не учествувала во акциските сцени.

„Таму бев таа што ја тепаат, а не таа што тепа. Затоа е убаво да научиш како да зададеш удар, а не само да го примиш“, рече Тарнер пред повредата.

Креатор на новиот проект е Фиби Волер-Бриџ, која при најавата на кастингот изјави дека Софи е „незапирлива“ и дека целиот тим е нетрпеллив околу враќањето на Лара Крофт на екраните. Сега, судбината на еден од најамбициозните проекти на Амазон виси на конец.

ФОТО | Прва фотографија од новата Лара Крофт: Еве како изгледа актерката што ќе ја наследи Анџелина Џоли