За време на годишниот ритуал во Лима, перуанските шамани предвидоа континуирани глобални конфликти во 2026 година и политички промени во Венецуела, а воедно повикаа на мир и стабилност низ целиот свет, пренесува Еуроњуз.

Перуанските шамани се собраа на ридот Сан Кристобал во Лима во последните денови од 2025 година за да го спроведат својот годишен ритуал и да споделат предвидувања за годината што претстои.

За време на церемонијата, духовните водачи рекоа дека меѓународните конфликти, вклучително и војната меѓу Украина и Русија, веројатно ќе продолжат и во 2026 година.

„Соединетите Држави треба да се подготват бидејќи Доналд Трамп ќе се разболи сериозно“, предвиде Хуан де Диос Гарсија додека тој и другите шамани се собраа на плажа јужно од Лима, носејќи шарени пончоси и расфрлајќи цвеќиња по песокот.

Шаманите држеа големи постери со фотографии од светски лидери преку кои вкрстуваа мечеви, чадеа темјан, а некои стапнаа на нив.

Некои шамани предвидоа и политички промени во Венецуела, изразувајќи надеж дека претседателот Николас Мадуро ќе се повлече следната година.

„Гледаме пораз за Николас Мадуро. Николас Мадуро ќе ја напушти Венецуела. Нема да биде уапсен“, предвиде Гарсија.

Ритуалот вклучуваше традиционална музика, танци и принесување цвеќиња, листови од кока и темјан, со цел да се поттикне мирот и подоброто донесување одлуки од страна на светските лидери. Шаманите, исто така, предупредија на можни природни катастрофи, како што се земјотреси и екстремни временски услови.

Организаторите забележаа дека иако предвидувањата привлекуваат внимание од јавноста секоја година, слични прогнози во минатото не се покажаа секогаш како точни.

Заедно со Трамп и Мадуро, шаманите држеа постери од рускиот претседател Владимир Путин, кинескиот претседател Си Џинпинг и украинскиот претседател Володимир Зеленски.

Гарсија предвиде дека Кеико Фуџимори, ќерката на поранешниот претседател Алберто Фуџимори, ќе излезе како победничка на претседателските избори во Перу по три неуспешни обиди.

Шаманите исто така го предвидуваат крајот на руската војна во Украина.

Оваа церемонија се одржува секоја година на крајот на декември. Во минатото, шаманите го предвидувале крајот на војната во Украина во 2023 година.