Претседателот Стево Пендаровски денеска се обрати на Меѓународниот ден на руралната жена на настан организиран во Крушево. Тој рече дека несомнено претстои голема работа за да ѝ  овозможиме економска самостојност и социјална интеграција на руралната жена. При тоа, неопходен услов е поддршката на женското лидерство и на организациите кои се занимаваат со оваа проблематика.

Гласот на руралната жена, нејзините потреби и проблемите со кои се соочува, треба да бидат чуени, но, и решени. Поддршката на оваа категорија жени не смее да биде декларативна и наменска, како што најчесто е, и не само на меѓународниот ден, туку суштинска и секојдневна. Затоа е потребен ангажман на сите засегнати страни и функционално партнерство меѓу државните институции и граѓанските организации заради вклучување на руралните жени во процесот на одлучување на сите нивоа, со што и самите ќе станат креатори на политиките и иницијативите за подобрување на нивната положба. Едноставно, со други зборови кажано, тие самите треба да одлучуваат за себе и за својата улога во општеството, рече Пендаровски.

Тој додаде дека е клучно да се надминат стереотипите и  традиционалното вреднување за местото и за улогата на жената во заедницата и во општеството, што е најизразено токму во руралните средини. Во овој контекст особено релевантни се темите за обезбедување на платено породилно отсуство и здравствено осигурување на жените земјоделки.

-Руралните жени се столб на локалната економија, придонесувајќи како земјоделки, сезонски работнички и како претприемачки. Со својот ангажман, тие, пред се, придонесуваат за одржување на семејството, односно, обезбедување на храна и намирници за домаќинството, но, и за производство кое го пласираат на пазарите. Покрај оваа работа, тука е и нивната секојдневна грижа за семејството и најголемиот товар околу подигнувањето и воспитувањето на децата. Накратко кажано, руралните жени сe пример за посветеност, солидарност и грижа за другите, истакна претседателот.

Тој рече дека руралните жени заслужуваат  добијат безрезервна поддршка и помош од секој од нас, во рамки на нашите надлежности.

Секако еден од начините за подобрување на состојбите е вмрежувањето и користењето на искуствата од другите земји. Затоа, го поздравувам создавањето на регионална платформа за заедничко дејство за подобрување на економската и социјалната состојба на руралните жени. Ги поздравувам и упатувам благодарност за присуството на денешниот настан на организациите коишто доаѓаат од земјите на Западниот Балкан и кои учествуваат, кои се дел од оваа регионална платформа, подвлече Пендаровски.