Еден маж загина, а едно девојче се води за исчезнато откако големи поплави ги погодија Шпанија и Португалија, објави „Скај њуз“.

Невремето „Леонардо“ го погоди Иберискиот Полуостров во вторникот, при што поројните дождови и силните ветрови предизвикаа поплави на патишта и населени места, оштетувајќи домови и принудувајќи жители да се евакуираат.

Еден маж, за кој се верува дека имал околу 70 години, загинал во јужниот португалски регион Алентежо во средата, откако неговиот автомобил бил однесен од надојдена вода, соопштија локалните власти.

Во меѓувреме, спасувачките служби трагаат по девојче кое било однесено од реката Турвиља во јужната шпанска покраина Малага, додека се обидувало да го спаси своето куче.

„Целото попладне и целата ноќ вчера пребарувавме по реката, од местото каде што девојчето падна до самиот крај на реката. Го пронајдовме кучето, но не и девојчето“, изјави шефот на противпожарната служба во Малага, Мануел Мармолејо.

Доаѓа бурата „Марта“

Двете земји оваа зима се погодени од т.н. „воз од бури“, а шпанската метеоролошка агенција АЕМЕТ најави дека викендов регионот ќе го погоди уште една бура – „Марта“.

Во регионот Гранада во Шпанија, улиците на градот Хуетор Тајар и околните полиња беа поплавени откако реката излезе од коритото, покажуваат снимки од дрон направени од шпанската Цивилна гарда.

Градот Сан Роке во провинцијата Кадиз, во шпанската покраина Андалузија, исто така, беше поплавен.

Невремето „Леонардо“ предизвика штети и во градот Лос Бариос во Андалузија, а реката Гвадалевин надојде во Ронда, Шпанија.

Снежна бура откажа околу 12.000 летови низ САД

Се извршиле над милион интервенции

Службите за итни интервенции во Андалузија до полноќ во средата регистрирале повеќе од еден милион интервенции, соопшти агенцијата на социјалната мрежа Икс.

Четиринаесет реки и 10 брани се наоѓаат под „екстремен“ ризик од прелевање, изјави шефот на регионалниот сектор за внатрешни работи, Антонио Санз.

Поради дождовите, училиштата низ Андалузија (освен во покраината Алмерија) се затворени, а дел од брзите возови се откажани, соопшти државната железничка компанија „Ренфе“.

Во меѓувреме, жителите на Алкасер ду Сал во јужна Португалија газеле низ вода до половината откако реката Садо излезе од коритото поради серија бури.

Терасите на рестораните беа целосно под вода, а пред вратите беа поставени вреќи со песок за заштита на домовите и на продавниците.

„Никогаш не сум видела нешто вакво. Надреално е. Има многу луѓе тука, добри луѓе, многу дуќанџии, домови со штети. Не би сакала да сум на нивно место“, изјави жителката Марија Кадаша.

Португалската Национална служба за цивилна заштита соопшти дека до четврток наутро регистрирала најмалку 70 инциденти.

Трошоците за обнова во Португалија по невремето „Кристин“ од минатата недела би можеле да надминат 4 милијарди евра, изјави министерот за економија Мануел Кастро Алмеида.

Бурата „Кристин“ остави шест загинати и илјадници луѓе без струја.

ВИДЕО | Португалија: Двe жртви и сериозни штети од бурата Кристин што ја зафати и Шпанија