Францускиот шампион ПСЖ дојде до трофејот и во Суперкупот на Франција по драматична победа над големиот ривал Олимпик Марсеј, обезбедена по изведувањето пенали.

Парижаните подобро го отворија натпреварот и уште во 13. минута дојдоа до водство, кога Осман Дембеле ја погоди мрежата на Марсеј за 1-0. Во продолжение ПСЖ имаше контрола, но Марсеј во второто полувреме направи неколку тактички промени и ја зголеми агресивноста во нападот.

Таквиот пристап вроди со плод во 76. минута, кога Гринвуд беше сигурен од белата точка и израмни на 1-1. Само десет минути подоцна следуваше шок за парижаните, откако автоголот на Пако му донесе водство на Марсеј (2-1). Сепак, ПСЖ не се предаде и во петтата минута од судиското продолжение Гонзало Рамош погоди за израмнување и ја однесе средбата во пенал-рулет.

Во пеналите фудбалерите на ПСЖ беа максимално прецизни, погодувајќи преку Витиња, Рамош, Мендеш и Дуе. На спротивната страна Марсеј не искористи два удари, откако О’Рајли и Траоре беа непрецизни, а единствениот успешен изведувач беше Муриљо, што му донесе трофеј на тимот од Париз.