За сите овие години коишто се позади нас, откога започна елдорадото со фотоволтаици, тука спаѓаат и инвестициите во ветерната енергија и хидроенергијата имаме инсталиран капацитет од над 600 мегавати. Овие бројки покажуваат какви политики се спроведуваат, изјави Дарио Николовски директор на Агенција за енергетика во утринска програма на „Слободен печат“.

„Наша прва и основна цел беше да ги олесниме процедурите низ кои се реализираат овие инвестиции. Акцент ставивме на домаќинствата и на субјектите коишто имаат можност да постават фотоволтаици на кров за своја потреба. Ако претходно се чекаше со месеци од општината да се добие дозвола за поставување, сега тоа се прави во еден ден со едно известување. Таа можност значеше многу пред се во делот на енергетската криза, и за домаќинстватата и компаниите коишто веќе поставија фотоволтаици на кров или имаат во план да постават. Со тоа се прави голема заштеда и се заштитува животната средина“, вели Николовски.

Тој додаде дека му е драго што опозициските градоначалници знаат да се пофалат со овие инвестиции и дека во име на добробит се надминуваат политичките различности со цел да се покаже дека резултатите носат добро за сите. Во однос на новинарското прашање околу инвестициите во делот на фоволтаици, Николовски дополнително додаде дека се` уште има простор за инвестирање во фотоволтаици и покрај поевтинувањето на електричната енергија

„И понатаму за бизнис секторот постои можност да инвестираат во паметни одлуки. Економскиот дел и понатаму е исплатлив, затоа што нашата цел како држава е да се придвижиме кон европската регулатива. Со националниот план за енегија и клима којшто го имаме, а тоа е во годините коишто следуваат целта е да дојдеме до зголемено производство на енергија од обновливи извори. Се` уште има простор, верувам дека ќе продолжат да се реализираат инвестициите“, потенцираше Николовски.

Тој смета дека целта на самата институција за енергетика била да се олеснат процедурите низ коишто се реализираат овие инвестиции.

Целото интервју со Дарио Николовски, директор на Агенција за енергетика погледнете го во видеото: