Рускиот заменик-амбасадор во Обединетите нации, Дмитриј Полјански даде интервју за британски „Скај њуз“, во кое тврди дека Русија „не краде деца, туку таа спасува деца“.

Полјански беше запрашан за конкретна приказна на „Скај њуз“ за петнаесет украински деца кои руската војска насила ги однела во Русија. Според проценките на украински невладини организации кои го следат проблемот, десетици илјади деца од Украина се противправно одведени во Русија, а овие наводи беа повод Хашкиот суд минатиот месец да издаде налог за апсење на рускиот претседател Владимир Путин.

Полјански за споменатата приказна рече дека тоа е „само уште една клевета, кампања против Русија, која овој пат, за жал, го искористува прашањето за децата во војна“.

Russia's deputy ambassador to the UN @Dpol_un says his country has been "accused of stealing children, but in fact we are saving children".

Fifteen Ukrainian orphans have told Sky News they were taken to Russia against their will.https://t.co/42ASRJNIdh

📺 Sky 501 / YouTube pic.twitter.com/Nz458gFd2g

— Sky News (@SkyNews) April 20, 2023

Инаку, во февруари САД објавија извештај во кој се вели дека Русија држи најмалку 6.000 украински деца, а веројатно и многу повеќе низ цела Русија, но и на Крим.

Некои деца веќе биле ставени во системот и посвоени од руски семејства или преместени во згрижувачки семејства во Русија, се вели во извештајот.

Најмалото дете запишано во руската програма имало само четири месеци, а некои кампови обезбедувале воена обука за деца на возраст од 14 години, објавија истражувачите од Универзитетот Јејл.