Со два меча во ноќта меѓу вторник и среда, започна новата сезона во НБА, најсилната кошаркарска лига во светот. Славеа домаќините, актуелниот шампион Голден Стејт го совлада Лос Анџелес Лејкерс со 123:109, додека Бостон победи против Филаделфија 126:117.

Вориорси не се мачеа многу против Лејкерси. По церемонијата на која им беа доделени шампионските прстени, домашните поведоа од самиот старт и постојано го зголемуваа водството. По првиот дел имаа три, а на полувремето седум поени предност.

Натпреварот беше решен во третата четвртина кога „воините“ значително го зголемија темпото и во еден момент имаа огромни „плус 27“ позитива (91:64). После тоа мирно го приведоа натпреварот до крај.

Steph (33 PTS, 6 REB, 7 AST, 4 STL) and the @warriors start the season 1-0 after a successful ring night in the Bay!

📲 https://t.co/WFdLNEjQ9Y pic.twitter.com/OWjxSMgx8Y

— NBA (@NBA) October 19, 2022

Најдобар во победничкиот клуб беше Стеф Кари со 33 поени, шест скока и седум асистенции. За „езерџиите“ Леброн Џејмс застана на 33 поени, 14 скока и шест асистенции, додека Дејвис постигна 27 поени.

Поинтересно беше во Бостон, каде Селтикс и Сиксерси одиграа тесен меч, особено во првото полувреме кое заврши 63:63. И на овој дуел клучни беа третите 12 минути кога Бостон стекна „плус 10“ и не му даде шанса на противникот да се врати.

Џејлен Браун и Џејсон Тејтум ги предводеа Селтикси со по 35 поени. Кај гостите Џејмс Харден исто така постигна 35 поени со осум скока и седум асистенции, а Ембид запиша учинок од 26 коша и 15 скока.

НБА, резултати –

Бостон селтикс – Филаделфија сиксерс 126:117
Голден Стејт вориорс – Лос Анџелес лејкерс 123:109