Роботска рака долга 22 метри ќе зема примероци од радиоактивен отпад од внатрешноста на оштетената нуклеарна централа Фукушима во Јапонија, соопшти вчера компанијата што ја управува, откривајќи го уредот во облик на змија, пренесува Јапан Тајмс.

Екстремно високите нивоа на радиоактивност го прават извлекувањето на стопено гориво и други отпади најтешка задача на локацијата за демонтирање на гигантската централа, што ќе трае со децении.

Tepco has unveiled a new robot arm to be used in a project to remove nuclear fuel debris at its tsunami-crippled Fukushima No. 1 nuclear plant. https://t.co/3s0c8810EH

— The Japan Times (@japantimes) February 26, 2026

Околу 880 тони опасни материјали остануваат во централата, местото на една од најлошите нуклеарни несреќи во историјата, по цунамито предизвикано од земјотрес со магнитуда од 9 степени во 2011 година.

Четириминутно видео објавено од „Тепко“ во средата покажува роботска рака слична на змија, долга 22 метри и тешка околу 4,6 тони, како се движи низ тесни премини слични на тунели и проверува сложени структури во затворен простор.

Опремен со камера, роботот „има повеќе можности за собирање информации“ од претходно користените алатки, изјави портпаролот на „Тепко“ за АФП.

Компанијата планира да го користи уредот оваа година за да спроведе трет обид за отстранување на остатоци од еден од оштетените реактори во нуклеарната централа Фукушима Даичи, додаде тој.
Многу мали примероци од радиоактивен материјал се земени двапати како дел од таа пилот-програма, но досега не е извршена екстракција во голем обем.

„Тепко“ во јули изјави дека големата операција ќе биде одложена барем до 2037 година. Компанијата претходно изјави дека се надева дека ќе започне на почетокот на 2030-тите.