Фудбалерите на Барселона убедливо славеа над Виљареал со 4-1 и направија чекор напред во трката за титулата. Каталонците сега имаат четири бода повеќе од Реал Мадрид, но и одигран натпревар повеќе.

Иако се очекуваше неизвесна пресметка меѓу водечкиот и третиот тим на табелата, домаќините уште во првото полувреме го скршија отпорот на „жолтата подморница“. Во 28. минута, по одлична асистенција од Фермин, блесна Ламин Јамал, кој ја затресе мрежата за 1-0. Само десет минути подоцна, истата комбинација донесе нов погодок, повторно Фермин го пронајде Јамал, кој издрибла неколку противнички фудбалери и погоди за 2-0.

Виљареал се врати во игра на стартот од вториот дел, кога Геј намали на 2-1 и внесе доза неизвесност. Сепак, Барселона брзо ја врати контролата. Во 69. минута Јамал го комплетираше хет-трикот, овојпат по додавање од Педри, за сигурни 3-1 и практично решен победник.

Точката на убедливата победа ја стави Роберт Левандовски во судиското продолжение, поставувајќи ги конечните 4-1 и крунисувајќи уште една доминантна вечер на Барселона.