Бостон доживеа вистински шок на стартот од плејофот на Истокот. Иако ја заврши регуларната сезона како второпласиран тим и имаше убедливо водство од 3-1 во серијата против Филаделфија, на крајот беше елиминиран по поразот на домашен терен со 100-109.

Филаделфија приреди големо изненадување. Тимот кој мораше да мине низ плеј-ин за да обезбеди место во разигрувањето, малкумина го гледаа како сериозен конкурент за Бостон, особено откако беше во негатива од 1-3. Сепак, следуваше неверојатен пресврт, три победи по ред, од кои две во Бостон, за конечни 4-3 во серијата и пласман во конференциското полуфинале, каде ги очекува дуел со Њујорк.

Клучниот чекор кон победата гостите го направија уште во првата четвртина, која ја добија со 32-19. Бостон се разбуди во вториот период, успеа да ја анулира разликата и накратко да поведе, но повторно падна во играта, па Филаделфија на пауза замина со 55-50.

Во третиот дел гостите стигнаа и до максимални +18 (84-66), најавувајќи сензација. Иако Бостон во последната четвртина двапати се доближи на само еден поен негатива, немаше сила за целосен пресврт.

Најзаслужен за триумфот беше Ембид со 34 поени и 12 скокови, додека Максеј додаде 30 поени и 11 скокови. Кај Бостон, Браун реализираше 33 поени, а Вајт постигна 26, но тоа не беше доволно да се избегне елиминацијата.