Фудбалерите на Астон Вила и Њукасл ги поделија бодовите во првото коло од Премиер лигата, откако на натпреварот во Бирмингем не беа постигнати голови (0:0).

За разлика од вчерашниот натпревар помеѓу Ливерпул и Борнмут, на кој имаше вистински „дожд“ од голови (4:2 за „црвените“), мечот помеѓу Астон Вила и Њукасл не ни понуди апсолутно ништо.

Веќе е познато дека Александер Исак започнал штрајк, дека сака да оди во Ливерпул и дека повеќе нема да го гледаме во дресот на Њукасл, а менаџерот Еди Хау итно треба да најде нов централен напаѓач. Не само што практично немаа никакви валидни шанси, туку не успеаја ниту да го искористат црвениот картон што го доби дефанзивецот на Вила, Езри Конса, во 67 минута од натпреварот.

Играчите на Унаи Емери покажаа идентична напаѓачка немоќ, бидејќи во првото полувреме дури и не шутираа кон голот на Ник Поуп. Второто полувреме им донесе неколку шанси, но беа доста млаки и недоволни.

Следниот натпревар на Астон Вила е на 23 август против Брентфорд, додека Њукасл е домаќин на Ливерпул два дена подоцна.