Четири члена на екипажот се во стабилна состојба откако два борбени авиони се судрија во воздух за време на американски аеромитинг, пренесува Би-би-си.

„Сите членови на екипажот на авионите ЕА-18Г на американската морнарица безбедно се катапултираа по судирот за време на воздушната демонстрација“, потврди портпарол на американската морнарица за Би-би-си.

Како што објави медиумот, не е јасно дали тие се повредени.

Footage of the mid air collision between a pair of Navy Super Hornets/Growlers during the Gunfighter Skies Air Show at Mountain Home Air Force Base moments ago. pic.twitter.com/yQqPavmSWk

— OSINTtechnical (@Osinttechnical) May 17, 2026

Драматичниот инцидент се случил вчера, за време на вториот и последен ден од воздушната демонстрација наречена „Ганфајтер скајс“, на околу три километри северозападно од воздухопловната база „Маунтин хоум“ во Ајдахо.

Несреќата предизвикала пожар, базата била накратко затворена, а остатокот од програмата на воздушното шоу – откажана. Започната е истрага за причината за несреќата.

„Членовите на екипажот вклучени во инцидентот се во стабилна состојба. Им благодариме на сите посетители за нивното трпение и разбирање, што ни овозможи брзо и безбедно да реагираме на инцидентот“, се вели во соопштението на „Маунтин Хоум Ганфајтерс“ на социјалните мрежи.

Портпаролот на морнарицата изјави дека членовите на екипажот биле прегледувани од медицински персонал.

Авионите ЕА-18Г биле доделени на ескадрила за електронски напади од државата Вашингтон. Американската морнарица наведува дека секој од тие авиони чини околу 67 милиони долари (50,3 милиони фунти).

Аеромитингот последен пат бил одржан во 2018 година, кога пилот загинал во несреќа.