Фудбалерите на Лацио денеска ја победија Џенова на Олимпико со 3:2 по драматичниот прв натпревар од 23 коло од Серија А. Сите пет гола беа постигнати во второто полувреме. Римскиот клуб имаше предност од 2:0, па гостите дојдоа до израмнување, но во финишот домаќинот стигна до бодовите.

Педро постигна гол од пенал во 56 минута, а Тејлор го зголеми водството на „волчицата“ шест минути подоцна.

Малиновски постигна гол од пенал во 67 минута за намалување на 2:1, а Витиња израмни за гостите во 75 минута.

Во судиското продолжение, Остигард играше со рака во шеснаесетникот, па судијата Цуферли, по консултација со ВАР, досуди пенал за домашниот тим.

Каталди постигна гол во 10-тата минута од судиското продолжение, за конечни 3:2.

Лацио е осми на табелата во италијанскиот шампионат со 32 бода, додека Џенова е на 16 позиција со 23.