ВИДЕО | Димевски: Фестивалот „Арт Ареа“ на едно место ги собира авторите од различните културни сфери

Од денеска, во организација на издавачката куќа „Бегемот“, во кафе-книжарницата Буква почнува книжевниот фестивал „АртАреа“, кој ќе трае три дена.

„Четвртото издание на фестивалот го одржуваме на отворено во дворот на кафе – книжарницата „Буква“ и повторно имаме три фестивалски денови. Арт ареа примарно е книжевен фестивал, се одржуваат литературни промоции, поетски читања , меѓутоа не е ограничен само на книжевноста. Напротив, целта на фестивалот е да го пополни јазот помеѓу разните културотворци во Македонија, односно да поттикне вмрежување и соработка на разните културни сфери, особено на младите автори и се надеваме дека тоа може да поттикне сериозна соработка и идни проекти. Оваа година остваривме соработка со етнолошкот друштво „Еснаф“ кои имаа идеја да ги изложат ракотворбите кои самите ги произведуваат, а ќе прикажеме и филм чиј автор е етнологот Виктор Трајановски, а снимател е Филип Јорданов, „Зикр – дервишкиот верски обред во Скопје“, кој ќе биде проследен со разговор со шејхот во рифаискиот тарикат и главен протагонист во филмот што се надевам дека ќе биде интересно за публиката. Со овој наш концепт овозможуваме авторите не само да ги промовираат своите дела, туку и да се сретнат меѓусебно и мислиме дека токму овој дел стана белег на нашиот фестивал“, вели за Утрински брифинг, Филип Димевски, организатор на фестивалот.

Во рамки на програмата вечерва ќе се одржи видеопромоцијата на романите „Пансион“ од Пјотр Пажињски (Полска) и „Чекајќи го Боџенглс“ од Оливие Бурдо (Полска), како и промоција на романот „Турнеја“ од Сашо Огненовски, чиј промотор ќе биде Владимир Мартиновски. Фестивалот „Арт ареа“ завршува во недела со проекции на новите македонски кратки играни филмови. https://www.youtube.com/watch?v=-Dn5-QZJbEg

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот