ВИДЕО: Демонстрантите во Тетово се обидоа да упаднат во седиштето на ДУИ, четворица полицајци се повредени

Протест во Тетово / 17 септември 2021 / фото: ТВ21/принтскрин

Полициски кордон мораше да го брани седиштето на ДУИ од гневните демонстранти во Мала Речица кај Тетово попладнево, откако тие се обидоа да влезат во централата на партијата.

Дел од жителите на Мала Речица се солидаризираа со денешниот протест во Тетово, а еден граѓанин им ја отвори вратата во дворот за да можат да го заобиколат кордонот, но полицијата беше подготвена и сепак не дозволи упад во партиското седиште. Според информации од МВР, четворица полицајци се повредени на денешниот протест, а двајца демонстранти се уапсени.

Еден од предводниците на протестот беше Ибин Емшиу, кој во трагичниот пожар во модуларната болница на 8 септември ги загуби таткото и братот.

Протест во Тетово / 17 септември 2021 / фото: ТВ21/принтскрин

Претходно, демонстрантите, кои бараат „одговорност и правда“ за жртвите во пожарот, маршираа низ Тетово, ја гаѓаа општинската зграда со јајца и извикуваа „Али, предавник“, по што го посетија и изгорениот објект на ковид-центарот.

Во катастрофалниот пожар на 8 септември, животот го загубија 14 луѓе, а 12 беа повредени.

Видео на денот