Италијанскиот шампион Наполи би можел ова лето да се засили со  ветеранот Џејми Варди. Искусниот англиски напаѓач е слободен агент по заминувањето од Лестер, а медиумите од Островот и Апенините сè почесто го поврзуваат со преселба во Серија А.

38-годишниот Варди, кој по крајот на сезоната 2024/25 ја затвори едната од највпечатливите епизоди во историјата на Лестер, сè уште е без клуб, иако интерес за него има од неколку страни, вклучувајќи ги Евертон, Селтик и Ренџерс. За време на својот престој во Лестер, Варди одигра над 500 натпревари и постигна 200 погодоци, а ќе остане запаметен како клучна фигура во шампионската генерација од 2016 година.

Сега, Наполи гледа кон Варди како потенцијално решение за проблемите во нападот. Тимот од „Сан Паоло“ е во потрага по искусен голгетер, откако стана јасно дека белгискиот ас Ромелу Лукаку би можел да паузира најмалку три месеци поради повреда на бутниот мускул.

Со оглед на искуството и голгетерскиот инстинкт што Варди сè уште го поседува, не е исклучено дека Наполи би се обидел да го доведе како краткорочно, но ефективно засилување во нападот.