Единствениот производител на конци и предива во Македонија, велешката компанија „Ветекс“, од почетокот на годинава го зголемила извозот и продала производи во вредност од 4,5 милиони евра, пишува „Фактор“.

Добивката на компанијата од почетокот на годината, па заклучно со септември годинава достигнува скоро 174.000 евра, покажуваат официјалните неревидирани податоци од билансот на успех, објавени на веб-страницата на Македонската берза.

Приходите на компанијата во првите девет месеци од годината ги зголемила и приходите за речиси шест отсто во споредба со истиот период лани.

Иако приходите се остварени од продажба на конец за плетење на домашниот и на странските пазари, сепак, зголемувањето на вкупниот приход е резултат на зголемената побарувачка на нивните производи од странските деловни партнери.

Истовремено, пораснале и расходите на „Ветекс“, а од компанијата појаснуваат дека тоа се должи на зголеменото производство – расходите се однесуваат на потрошени суровини и материјали за производство, трошоци за електрична енергија, мазут и трошоци за плати и надоместоци за вработените.