Вардар1961 финалист на турнирот „Хумел куп“ во Магдебург
Денеска во полуфиналето играчите предводени од тренерот Весели Вујовиќ триумфираа над данскиот клуб Холстебро со 33:28 на турнирот „Хумел куп“ во Магдебург, Германија.
Во текот на првите 30 минути се играше израмнето на двете страни, и ниту една од екипите немаше поголема позитива од два гола, по првото полувреме македонскиот шампион имаше минимално водство од 14:13.
Во вториот дел нашиот претставник се одвои резултатски, кога направи серија на погодоци и стекна „плус пет“ на семафорот.
За „црвено-црните“ најефикасни беа Талески и Тото со по шест голови, пет запиша Гурбиндо.
Четири погодоци беа дело на Мишевски, три имаше Моралес, по два Ѓукиќ, Чувара и Валчак, а по еден Дибиров, Гаџа и Јагуриновски.
Вардар1961 в недела во финалето ќе игра против победникот од дуелот Магдебург и словенечкиот Горење.