Ракометарите на Вардар ги завршија настапите во Лигата на шампионите откако и во вториот натпревар од осминафиналето во ЛШ загуби од Веспрем. Унгарскиот тим во реваншот славеше со 39:30, но работите беа решени уште на првата средба во Скопје  која заврши со 27:41.

Токму поради високата победа на првата средба, и двете екипи влегоа во овој натпревар поопуштено без бремето кое го носи резултатот и „црвено-црните“ прикажаа далеку подобра игра. Воведните минути поминаа во израмнета игра, а Веспрем со серијата од 3:0 поведе со 9:6 и постепено ја зголемуваше разликата. На одмор се замина со пет гола негатива за Вардар 20:15.
Унгарците рутински го одработија второто полувреме, прво направија предност од десет гола (30:20) по што го намалија темпото, по што Вардар успеа да намали на 31:25. Но, серијата грешки во финишот ги чинеше нов висок пораз, овој пат од девет гола 39:30.

Стоилов и Дибиров постигнаа беа најпрецизни кај Вардар со по пет постигнати голови, додека Чупиќ и Шеваљевиќ дадоа по четири, а на спротивната страна Шишкарев и Нилсон дадоа по шест гола. Екипата на Веспрем во четвртфиналето на ЛШ ќе игра против Кире Лазаров и Нант.