Ванеса Трамп, поранешната сопруга на Доналд Трамп Помладиот и мајка на пет деца, откри дека ѝ бил дијагностициран рак на дојка и дека заедно со лекарскиот тим подготвува план за лекување, пишува „Си-ен-ен“.

Таа веста ја сподели преку објава на социјалните мрежи, наведувајќи дека на почетокот на неделава била подложена на медицински зафат, по што побарала приватност додека се посветува на своето здравје и закрепнување.

„Иако ова не е вест што некој ја очекува, тесно соработувам со мојот медицински тим на план за лекување“, напиша Ванеса Трамп.

Во продолжение порача дека останува силна и полна со надеж благодарение на поддршката од семејството и најблиските.

„Останувам фокусирана и полна со надеж, опкружена со љубовта и поддршката од моето семејство, моите деца и луѓето што ми се најблиски. Ви благодарам за вашата добрина и поддршка, тоа навистина значи повеќе отколку што можам да опишам“, наведе таа.

Ванеса Трамп и Доналд Трамп Помладиот, најстариот син на американскиот претседател Доналд Трамп, се разведоа во 2018 година по 12 години брак. Заедно имаат пет деца, меѓу кои и 19-годишната Кај Трамп, која има голем број следбеници на социјалните мрежи и често се појавува со својот дедо во Белата куќа.

Ванеса моментално е во врска со познатиот голфер Тајгер Вудс, кој минатиот март јавно потврди дека се заедно.

Јавна поддршка ѝ упати и Иванка Трамп, ќерката на Доналд Трамп, која во коментар напиша:

„Се молам за твојата сила и брзо закрепнување. Те сакам.“