Веста за откривање на мртво новороденче во торба оставена пред црква во областа Нотинг Хил предизвика бурни реакции во Лондон. Метрополитен полицијата соопшти дека биле повикани во 12:46 часот во вторникот на улицата Талбот по пријава за бебе во торба оставено пред црква.

Спасувачите дошле на местото на настанот и констатирале смрт на новороденчето, јавува Би-би-си.

Властите веднаш започнаа истрага за лоцирање на мајката, а Метрополитенската полиција соопшти дека точната возраст на новороденчето сè уште не е утврдена.

Шефот на локалната полиција, инспекторот Овен Реноуден, го опиша случајот како „крајно тажен и шокантен“, додавајќи дека властите се обидуваат да ги расветлат околностите под кои се случил инцидентот.

„Наш приоритет во овој момент е да ја лоцираме мајката на новороденчето, бидејќи веруваме дека таа можеби се породила неодамна“, истакна тој.

Обраќајќи ѝ се директно на мајката, тој рече: „Ако сте мајка и ја читате оваа порака, ве молиме контактирајте ги властите или лекарите. Наш приоритет е грижата и поддршката за вас“.