УТРИНСКИ БРИФИНГ | Серафимовски: Цените на квалитетни станови се исти како на неквалитетните

Андреја Серафимовски, Асоцијација на градежништво при Стопанска комора / Утрински брифинг

Во градежништвото деновиве се појавија проценки дека ќе се појави тренд на галопирачки цени на станбениот квадратен метар. Според некои проекции, можно е цената на станбениот квадрат во Скопје да порасне до 2000 евра.

За ова во Утрински брифинг се разговараше со Андреја Серафимовски, дел од менаџерскиот тим на градежната компанија „Гранит“ и дел од Асоцијацијата за градежништво при Стопанската комора.

-Поскапувањето на становите е последица од состојбите што произлегоа од ковид пандемијата, поскапувањето на цената на работната рака, на градежните материјали, како и на мораториумот за градење што го воведоа последниве години некои општини, вели Серафимовски за Утрински брифинг.

Според него, трендот на раст на цените зависи од куповната моќ, а кај нас граѓаните немаат голема куповна моќ па се очекува дека тој тренд ќе прекине. Серафимовски коментира дека поголем проблем од самата цена на становите е што иста цена има и квалитетната и неквалитетната градба на иста локација.

-Компаниите што градат квалитетно, на пример во Центар, влегуваат во загуба затоа што цената на нивниот производ е иста како и на неквалитетен производ на истата локација, вели Серафимовски.

Тој додава дека ние всушност купуваме станови од потреба, на пример да бидат блиску до работното место, а не според нашиот стил на живот па и тоа е еден од факторите на движењето на цените со оглед што голем дел од деловните активности се одвиваат во главниот град и во Центарот на Скопје.

Видео на денот