Советот за безбедност на ОН ќе свика итен состанок во вторник по прашањето на израелските заложници во Појасот Газа, објави вчера постојаниот претставник на Израел во меѓународната организација, во услови на атмосфера на негодување поради нивната судбина во енклавата, уништена по 22 месеци војна и загрозена од глад.

Дени Данон, амбасадорот на Израел во Обединетите нации, го објави состанокот преку социјалните мрежи, неколку дена откако беа објавени видеа на кои се прикажани двајца ужасно ослабени израелски заложници.

Данон појасни дека Советот за безбедност „ќе се состане (утре) во вторник на итен состанок за катастрофалната состојба на заложниците во Газа“.

Објавувањето во четвртокот од страна на Палестинското исламистичко движење и неговиот сојузник, Палестинскиот исламски џихад, на три видеа на кои се прикажани овие двајца израелски заложници ослабени, предизвика силни емоционални реакции во Израел и интензивна дебата за потребата од постигнување договор за ослободување на овие луѓе, кои беа киднапирани за време на невидениот напад на Хамас на јужниот дел од израелската територија на 7 октомври 2023 година, што беше повод за војната.

Израелскиот премиер Бенјамин Нетанјаху вчера побара помош од Меѓународниот комитет на Црвениот крст и Црвената полумесечина (МКЦК) за „обезбедување храна“, како и „медицинска нега“ за заложниците.

Кратко потоа, военото крило на Хамас ја изјави својата подготвеност да одговори „позитивно“ на секое барање од МКЦК, но претходно побара „отворање на хуманитарни коридори на ОН за да се овозможи внесување храна и лекови“ во Појасот Газа.

Бригадите Ал-Касам „не ги лишуваат намерно затворениците од храна“, тврди движењето, додавајќи дека заложниците „не се третираат поповолно сè додека продолжуваат блокадата и политиката на гладување“.

Видеата објавени од Хамас ја прикажуваат катастрофалната хуманитарна ситуација во Појасот Газа.

Палестинската енклава, која е целосно зависна од хуманитарна помош, се соочува со закана од „општа глад“, предупредуваат ОН.

Меѓународните организации и невладините организации ги осудуваат постојаните пречки од страна на израелските власти, кои го поттикнуваат хаосот. Според извори во хуманитарните организации и експерти, помошта, која пристигнува капка по капка, ја ограбуваат банди.

Во нападот на военото крило на Хамас врз јужниот дел од израелската територија на 7 октомври 2023 година, 1.219 лица ги загубија животите на израелска страна, од кои повеќето цивили, според пребројувањето на агенцијата Франс-прес врз основа на официјални израелски податоци.

Во големите израелски воени одмазднички операции, 60.332 лица ги загубија животите во Појасот Газа, од кои повеќето се цивили, според податоците од Министерството за здравство на владата на Хамас, кои ОН ги смета за веродостојни.

Од 251 лице кои беа киднапирани на 7 октомври 2023 година, 49 остануваат во палестинската енклава, но 27 од нив се прогласени за мртви од страна на израелската армија, по два договори за прекин на огнот што дозволија ослободување на останатите.

ВИДЕО | Вооруженото крило на Хамас објави снимка од израелски заложник