Утре ќе се одржи Арт-бостание во Општествената градина во Лисиче: Фиќовото градинче ќе биде отворено за сите!
Викендот може да почне со убави нешта, или мала уметничка ѓурултија: Утре во општествената градина „Бостание’, во паркот во Ново Лисиче со почеток од 12 часот, ќе се „крене“ зимско арт-бостание.
Организаторот на ова арт-бостание се момците од алтернативниот културен центар КЦ 750, односно малото зелено фиќо што се „тркала“ неуморно низ уметничките пејсажи на градот.
Уметниците кои ќе бидат застапени на ова бостание ќе направат уметничка инсталација преку која ќе го претстават чудесното патување на едно откачено македонско семејство. Тие се: Владимир Лукаш, Тома Димовски, Сали Ертунч, Вук Митевски и Иван Ивановски.
Во пресрет на настанот, добивме ексклузивна изјава од еден од организаторите и основачите на КЦ 750, Иван Шопов:
„Се радуваме што ќе го паркираме КЦ 750 на местото што внесе многу свежина и убава енергија во Скопје изминатиов период – општествената градина “Бостание”. Нашите домаќини се отворени и за други видови култури освен земјоделските, а ние сме секогаш тука за арт-ѓурултии и кревање креативна џева. Па, се надеваме дека ќе се изроди интересен резултат од соработката на една неконвенционална иницијатива со друга, дабетер неконвенционална“ – низ смеа ни објасни тој.
Дел од арт-бостанието ќе биде и проекцијата на кратки експериментални видеа од Љубиша Камењаров, Валентина Бактијаревиќ, Иван Ивановски, Владимир Лукаш, Вук Митевски и Ѓорѓе Јовановиќ.