Фронтменот на српската рок група „Ван Гог“, Ѕвонимир Ѓукиќ Ѓуле добитник е на престижната награда „Струни од светлина“, која се доделува за посебен придонес во афирмацијата на поетскиот збор во блуз и рок музиката.

Лауреатот, покрај плаката добива и една гитара од колекцијата на писателот и кантавтор Саша Радоњиќ, кој започна да ја доделува оваа награда пред шест години.

Во образоложението на жирито, кое се состои од Богомир Богица Мијатовиќ (претседател), др Мирослав Радоњиќ и Саша Радоњиќ, покрај другото, стои и дека Ѕвонимир Ѓукиќ Ѓуле е естетска константа на домашната и балканската рок сцена повеќе од 30 години, нешто што само по себе заслужува голема почит.

„Креативноста на неговото високо поетизирано пишување на текстови е неодамна презентирано и преку книгата „Море без обала“, која покрај добро познатите строфи и стихови на Ѓуле носи и еден вистински драгоцен бонус во вид на негови фотографски дела, за кои сосема слободно може да се каже дека исто така се чиста поезија“, смета споменатото жири.

Тие истакнуваат и дека вистински доказ за уникатните вештини на Ѓуле како текстописец и композитор е и синглот од минатата година насловен „Емотивно миниран“.

Жирито за време на овогодинешното доделување на наградата донесе уште една одлука, а тоа е од оваа година во рамките на наградата „Струни од светлина“, да се внесе и признание за млади креатори во рок културата и музиката.