Кошаркарската репрезентација на Македонија го запиша и вториот пораз во претквалификациите за Светското првенство, откако вечерва Унгарија на вој терен беше подобра со 96-58.

Со овој резултат, стана јасно дека шансите за пласман во главната квалификациска фаза се сведени на минимум, со оглед на тоа што само првите две селекции од групата продолжуваат понатаму. Иако се знаеше дека Македонија настапува со подмладен состав и со ограничено искуство, разликата на теренот беше преголема.

Избраниците на селекторот Илиевски парираа само во првите десет минути, кои завршија со тесна предност на домаќините (19-18). Но, вториот период започна катастрофално, Унгарија направи серија од 16-0 и практично го реши прашањето на победникот уште пред полувремето.

Македонија успеа да одржи некакво темпо во третата четвртина, но нов пад следеше во последниот дел од мечот, кога Унгарците повторно „експлодираа“, отворија со 21-2 и на моменти имаа и +41 разлика (94-53). Со таков развој на настаните, тешко беше дури и да се намали резултатот до пристојна граница.

Џејкоб Вајли беше единствената светла точка кај „црвено-жолтите“ со 15 поени, Магдевски уфрли 11, а Симиќ додаде 10. Унгарската селекција доминираше во речиси сите сегменти, особено во скокот (43 наспроти 29) и во прецизноста од далечина, погодувајќи дури 15 тројки, најчесто од непречени позиции.