По неколкудневните обилни врнежи, нивото на реката Вардар во Скопје и натаму се задржува на границата на критичните вредности. Надлежните апелираат на внимателност, особено за граѓаните кои се движат покрај речното корито и кејот, каде што на пониските и послабо осветлени делови ризикот е најголем.

Од Управа за хидрометеоролошки работи информираат дека, според последните прогнози, водостојот на реките во Скопје и во горните делови на сливовите ќе остане покачен и во наредните часови. Сепак, се очекува постепено намалување на нивото во текот на ноќта.

Во поголем дел од земјава моментално има мешани врнежи, а со навлегување на постуден воздух од север, дождот во попладневните и вечерните часови постепено ќе преминува во снег.

Најизразен ризик од локални излевања и задржување на вода има во западните и југозападните региони, каде што врнежите подолго ќе останат во форма на дожд пред да преминат во снег.