Американскиот актер Томас Џеферсон Бирд (70), кој глумеше во голем број филмови на режисерот Спајк Ли, беше застрелан во Атланта викендов.

Полицијата го пронашла актерот во саботата наутро со неколку куршуми во грбот. Лекарите упатени на местото каде што бил пронајден, можеле само да ја потврдат смртта. Истрагата за инцидентот е во тек, а полицијата досега никого не уапсила.

Големо театарско искуство

Актерот со големо театарско искуство, Томас Џеферсон Бирд, се појави на филм дури на 45-годишна возраст кога Спајк Ли му ја понуди споредната улога во филмот „Ситни дилери“.

Тој успеа да ја наметне својата глума и нетипичен изглед во светот на Спајк Ли, а потоа и други режисери почнаа да го ангажираат.

Продолжи да учествува во проекти на Спајк Ли, а неодамна глумеше во сериите „She’s Gotta Have It“ (2017 – 2019) и во филмот „Chi-Raq“ (2015).

„Том е мој пријател“, напиша Спајк Ли на Инстаграм и додаде дека е „многу тажен“.