Полицијата соопшти дека го уапсила возачот на автомобилот кој му го препречи патот на мотор на „Пластичарската“ улица во Скопје. Во тешкиот судир загина 19-годишниот мотоциклист.

Според МВР, несреќата, која се случила на крстосницата меѓу булеварот „Никола Карев“ и улицата „Прохор Пчински“, е пријавена вчера нешто пред 22:30 часот.

„Во судирот учествувале патничко возило „ауди а4“ со скопски регистарски ознаки, управувано од Н.Х. на возраст од 31 година од село Визбегово, и два моторцикли. Едниот моторцикл бил „БМВ“, управуван од 19-годишниот М.Ф. од Скопје, а вториот бил „хонда адв“, управуван од Н.Б. на возраст од 21 година, исто така од Скопје. Во судирот, со тешки телесни повреди се здобил 19-годишниот возач на моторциклот „БМВ“. Тој итно бил пренесен во Комплексот клиники „Мајка Тереза“, каде и им подлегнал на повредите. На местото на несреќата бил извршен детален увид од јавен обвинител и екипа од СВР Скопје“, велат од полицијата.

Порталот „Алмакос“ објави снимка од местото направена непосредно по несреќата.

Медиумите денеска објавија и вознемирувачка снимка од моментот на трагичниот судир, снимена од безбедносна камера.

ВОЗНЕМИРУВАЧКО ВИДЕО: Фатална несреќа во Скопје — загина млад моторџија