По убедливиот пораз од Јапонија на стартот, во својот втор натпревар македонската одбојкарска сениорска репрезентација на традиционалниот меморијален турнир „Чајка“ ја совлада селекцијата на Египет со 3:2 во сетови.

Првиот сет успеаја избраниците на селекторот Јошко Миленкоски да го добијат со 25:22.

Се реваншираа Египќаните освојувајќи ги следните два сета со 22:25 и 21:25 за преземање на водството.

Но, нашите најдобри одбојкари направија пресврт откако најпрвин израмни во четвртиот сет (25:23) и во решавачкиот беа подобри со 16:14.

Капитенот Никола Ѓорѓиев запиша 32 поени, Александар Љафтов 24, а двајцата имаа одличен процент на реализација. Филип Савовски заврши со осум, Владо Милев со четири, Стојан Илиев и Ѓорѓи Ѓорѓиев со по три, а Славе Наков еден поен. Филип Маџунков не беше во составот.

Инаку турнирот „Чајка“ е последна подготовка пред настапот на Европското првенство 2023 во Скопје.

Последниот меч на турнирот Македонија ќе го има денеска од 20.15 часот во СЦ „Борис Трајковски“ против Грција, а бесплатен е влезот за сите љубители на одбојката и спортот.