Туркоглу ја поздрави одлуката на македонската кошаркарска федерација
– Ваквите одлуки се потребни за да се спречи негово ширење и заканување по здравјето на сите спортисти – вели Туркоглу.
Претседателот на Турската кошаркарска федерација, Хидајет Туркоглу, испрати поздравна порака за одлуката со која претседателот на КФСМ, Перо Антиќ, заедно со соработниците, ставија крај на шампионатот на Македонија поради пандемијата со коронавирусот.
– Честитки до мојот драг пријател Перо Антиќ и сите негови соработници во федерацијата на Македонија за донесената одлука да се прекине првенството. Тоа значително ќе помогне да се сочува здравјето на играчите. Се наоѓаме во специфично време во кое коронавирусот е непредвидлив, па затоа ваквите одлуки се потребни за да се спречи негово ширење и заканување по здравјето на сите спортисти.
Здравјето е приоритет во вакви вонредни ситуации, надевајќи се дека набрзо ќе се вратиме во нормален тек на животот – гласи пораката на легендата на турската кошарка, кој пред една година го поддржа Перо Антиќ за претседател на кошаркарската федерација на Македонија.
Туркоглу освен што е прв човек на турската кошарка, како играч настапуваше во НБА лигата за Лос Анџелес Клиперс, Орландо Меџик, Феникс Санс, Торонто Репторс, Сан Антонио Спарс и Сакраменто Кингс, а својата професионална кариера ја започна на домашно тло во дресот на Ефес Пилсен.
Со турската сениорска репрезентација успеа да освои по еден сребрен медал на Евробаскет 2001 и на Светското првенство 2010, интересно и двата шампионати одржани во неговата земја.