Џарел Кванса заработи црвен картон за време на осминафиналниот натпревар на Англија против Мексико. Иако во таборот на Англија постоеше надеж дека казната може да биде поништена, ФИФА ја потврди суспензијата и дополнително ја зголеми.

Во второто полувреме против Мексико, Кванса направи остар старт врз Хесус Гаљардо. Прекршокот беше оценет како сериозна недозволена игра, по што англискиот дефанзивец директно беше исклучен. Вообичаено, ваков црвен картон носи автоматска суспензија од еден натпревар.

Сепак, ФИФА одлучи да изрече построга казна. Светската фудбалска организација соопшти дека Кванса е суспендиран на два натпревари, и покрај обидот на Англија да го поништи црвениот картон. Претходно на турнирот за сличен старт му беше поништен црвениот картон на напаѓачот на САД, Фоларин Балогун.

Проблеми за Англија при изборот на составот

Без Кванса во тимот, Англија, една од осумте светски шампионски репрезентации, се соочува со сериозни проблеми при изборот на составот пред клучниот дуел против Норвешка. Позицијата десен бек му создава главоболки на селекторот Томас Тухел. Рис Џејмс е повреден, Џон Стоунс и Езри Конса не се класични бекови, а Џед Спенс не ги исполни очекувањата кога добиваше шанса.

Џарел Кванса ќе има право да настапи во финалето на Светското првенство доколку Англија стигне до последниот натпревар. Неговата суспензија од два меча ги опфаќа четвртфиналето против Норвешка и потенцијалното полуфинале против Аргентина или Швајцарија.

Доколку Англија не успее да ја победи Норвешка, вториот натпревар од суспензијата ќе се префрли на следниот официјален меч на „трите лава“.

Сепак, целта на Англија е да одигра уште три натпревари на турнирот и да стигне до финалето на Светското првенство..

Тибо Куртоа пред пресметката со Шпанија: „Започнуваме како аутсајдери, но во фудбалот сè е можно“