Турската Национална разузнавачка организација (МИТ) приведе двајца турски државјани во Истанбул поради сомнежи дека дејствувале во име на израелската разузнавачка служба Мосад преку параван-компании, објави „Хуријет“.

Еден од осомничените, Мехмет Будак Дерја, рударски инженер, во 2005 година основал трговска компанија и развил деловни врски со повеќе земји – профил што подоцна го привлекол вниманието на израелската разузнавачка служба, според безбедносни извори.

Мосад му тропнал на врата

Дерја првпат бил контактиран во септември 2012 година од човек со псевдонимот Али Ахмед Јасин, кој рекол дека е претставник на компанија и предложил деловно партнерство.

МИТ утврдила дека за време на овие средби, израелски разузнавачки офицери разговарале за трговија со мермер и му наложиле на Дерја да го вработи Вејсел Керимоглу, турски државјанин со палестинско потекло.

Постапувајќи по насоките на Мосад, Дерја го вработил Керимоглу и редовно им ги пријавувал нивните активности на израелските контакти. Разузнавачки извори наведуваат дека двајцата споделувале детали за деловните чекори, контактите и за движењата со Мосад.

Руски шпион уапсен во Полска, со децении работел во Министерството за одбрана

Преку Керимоглу, Дерја ја проширил трговијата во земјите од Блискиот Исток и воспоставил социјални и деловни врски со Палестинци кои се спротивставуваат на регионалните политики на Израел.

Собраните информации за овие луѓе биле проследувани до израелската разузнавачка служба. Дерја се обидел и да обезбеди дозволи за влез во Газа преку деловни канали и испраќал фотографии од складишта на Мосад.

Му нуделе дронови на инженер кој подоцна бил убиен од Мосад

Во 2016 година, Керимоглу предложил влез во трговија со делови за дронови, план што веднаш бил пренесен до израелската разузнавачка служба и поддржан со примероци обезбедени од Мосад, се наведува во наодите. Наводно, двајцата се обиделе да продадат дронови на Мохамед Зуари, туниски инженер убиен од израелската разузнавачка служба во 2016 година.

МИТ соопшти дека Дерја одржувал контакти со повеќе офицери на Мосад под различни псевдоними на средби во трети земји низ Европа и бил подложен на два полиграфски теста – во 2016 година и повторно во август 2024 година.

Иран погуби човек обвинет за шпионажа за Израел

Во јануари 2026 година, Дерја наводно разговарал за планови за основање параван-компанија во странство со цел инфилтрација во меѓународни синџири на снабдување во име на израелската разузнавачка служба. Тој бил приведен пред планот да биде реализиран.

Турција во последниве години ги засили контраразузнавачките операции, при што во 2024-2025 година приведе повеќемина луѓе поврзани со активности на Мосад.

Во јануари, властите уапсија и шест осомничени, меѓу кои и еден ирански државјанин, под обвинение за шпионажа во корист на Иран.