Долгогодишен вработен во полското Министерство за национална одбрана е приведен под сомнение за шпионажа за Русија, а апсењето е извршено во самата зграда на министерството.

Осомничениот, за кој се верува дека работел за руската разузнавачка служба, имал позиција на средно ниво во Одделот за одбранбена стратегија и планирање, објавува „Полска еден“.

Тој бил изнесен од зградата на министерството од страна на припадници на воената полиција, а самата операција е резултат на долгорочна истрага спроведена од воената контраразузнавачка служба.

СКВ го сомничи за соработка со претставници на руските и белоруските разузнавачки служби. Детали за апсењето даде  портпаролот на службата, Јацек Добжински кој изјави дека воената контраразузнавачка служба собрала „обемни информации“ што потврдуваат дека осомничениот ја предал Полска и работел за странска разузнавачка служба, објавува „Онет“.

Наводниот шпион е уапсен по 8 часот наутро денес, кратко откако пристигнал на работа. Шеесетгодишникот, кој немал никакви сомневања, е вработен во министерството од 1990-тите, каде што имал разни позиции на средно ниво во одделот за стратегија и одбранбено планирање. Деталите за случајот ги презентираше на прес-конференција Јацек Добжински.

 „Ова е долгогодишен вработен. Тој е цивил, а не војник, а камоли офицер. Тој бил под надзор на воената контраразузнавачка служба, која собрала обемни и инкриминирачки информации за него, потврдувајќи дека овој господин ги предал Полска и Полјаците. Тој шпионирал за странска разузнавачка служба“, рече Добжински.

Апсењето го извршиле припадници на воената контраразузнавачка служба, но пред сè воената полиција. Беше извршено по наредба на военото обвинителство“, додаде тој.

„Овој господин беше информиран за причината за неговото апсење, а потоа беа спроведени процедурални дејствија за време на кои беа обезбедени разни документи. Тој сега е на располагање на канцеларијата на воениот обвинител.  Ова е многу сериозен случај бидејќи станува збор за предавство против Полска“, продолжи Добжински.

Службите ги следат активностите на овој човек со месеци. Неговите постапки се документирани и анализирани детално, па затоа доказите собрани против него се многу солидни. Ова е еден од најголемите успеси“, уверува извор запознаен со деталите од операцијата. Уапсениот човек моментално е испрашуван од одделот за воени работи на Окружното обвинителство во Варшава.