Водечкиот производител на чипови Тајван Семикондуктор Мануфактуринг Компани (ТСМЦ) започна масовно производство на нова генерација чипови во родниот Тајван.

„ТСМЦ ја потврдува својата водечка позиција во технологијата и во исто време прави значителни инвестиции во Тајван“, рече претседателот, Марк Лиу, на церемонијата по повод одбележувањето на производството и проширувањето на капацитетот во јужниот тајвански град Таинан, пренесува Хина.

Побарувачката за чипови од 3 нанометри е многу силна благодарение на новите технологии, вклучувајќи 5Г и компјутерски производи со високи перформанси, нагласи Лиу, без да даде детали. Чиповите базирани на новата 3-нанометарска технологија (Н3) бараат помалку простор и енергија, а се побрзи и поефикасни. TСМЦ во декември соопшти дека повеќе од трипати ќе ја зголеми планираната инвестиција во нова фабрика во САД на 40 милијарди долари. Неговата инвестиција е меѓу најголемите странски инвестиции во историјата на САД.

Тајванската компанија гради и фабрика за чипови во Јапонија и најави дека ја разгледува можноста за проширување на бизнисот и во Германија. TСМЦ објави и дека го подготвува теренот за изградба на фабрики за уште пософистицирани чипови од 2 нанометри, кои исто така треба да се произведуваат во Тајван.