Додека на другите им ги лекуваше срцата со своите стихови, Витни Хјустон носеше тежини во сопствената душа што ја гушеа до крајни граници, сѐ додека не поклекна и не им се препушти на алкохолот и наркотиците. Се издигнуваше како феникс од пепелта, но нејзиното срце повеќе не можеше да ги издржи ударите од сите страни.

Денес многумина тврдат дека пејачка како неа повеќе нема да се роди – дека беше неповторлива, маестрална, дека секоја нејзина песна е ремек-дело. Тоа го потврдува и фактот што нејзините хитови не ја губат популарноста. Напротив, секоја нова генерација ги обожава. Таа беше кралица без круна, со микрофонот како свое единствено и најмоќно оружје. Со само 48 години, таа стана бесмртна.

Хјустон ја носи титулата најдобар женски вокал на осумдесеттите и деведесеттите години од минатиот век и најнаградуван изведувач со повеќе од 400 признанија.

Изненадна смрт

Хјустон почина на 48-годишна возраст, на 11 февруари 2012 година, во Лос Анџелес. Пејачката беше пронајдена мртва во хотелот „Беверли Хилтон“, каде што следната вечер требаше да се одржи церемонијата на доделување на наградите Греми, на која беше поканета. Неколку дена претходно била видена на забава што традиционално се одржува во пресрет на доделувањето на престижните признанија.

Последен пат јавно настапи ден претходно, кога непланирано се искачи на сцената за време на забавата пред Греми и отпеа дел од песната „Yes Jesus Loves Me“.

Иако не беа пронајдени дрога или алкохол во непосредна близина, полицијата веруваше дека пејачката претходно таа вечер консумирала алкохол, а потоа и лекови – комбинација што ја успала во кадата, поради што се удавила.

Нејзината портпаролка Кристин Фостер ја потврди смртта, која се случила неколку часа пред да настапи на традиционалната забава на Клајв Дејвис во хотелот „Беверли Хилтон“.

„Можам да потврдам дека Витни Хјустон беше прогласена за мртва во 15.55 часот во хотелот ‘Беверли Хилтон’. Повикот го примивме во 15.43 од обезбедувањето на хотелот, а полицијата реагираше неколку минути подоцна“, изјави тогаш поручникот на полицијата во Беверли Хилс, Марк Розен, за списанието „Пипл“.

„Некој од нејзината придружба ја пронашол во несвесна состојба во собата… Не е јасно кој го известил хотелскиот персонал, бидејќи имаше голема придружба во хотелот. Се обидовме да ја реанимираме, но безуспешно“.

Шокантни резултати од обдукцијата

Деталите од обдукцијата на големата поп-ѕвезда излегоа во јавноста во 2020 година, откривајќи шокантни информации за нејзината состојба.

Во крвта ѝ биле пронајдени девет различни видови дроги, што ја шокирало нејзината фамилија. Пејачката имала срцеви проблеми, проширена артерија и девијација на носната преграда како последица од консумирање кокаин. На внатрешниот дел од левиот лакт биле забележани траги од игла, како и лузни под градите од вградените импланти.

Најголемо изненадување за лекарите било состојбата на нејзините заби. Според извештајот, ѝ недостигале 11 предни заби, што го криела со протеза. Тина Браун, сестра на Боби Браун, изјави дека забите ѝ испаднале поради прекумерна употреба на кокаин.

„Губеше заби насекаде. И дома, и кога беше надвор под дејство на дрога. Постојано нарачуваше нови, кои ги плаќаше по 6.000 долари“, рече Тина.

Погреб и емотивен говор на Кевин Костнер

На нејзиниот погреб присуствуваа семејството и блиските пријатели, а емотивен говор одржа нејзиниот долгогодишен пријател Кевин Костнер. Двајцата се зближија за време на снимањето на филмот „Телохранителот“ (The Bodyguard) (1992), кој заработи повеќе од 400 милиони долари. Костнер инсистирал токму таа да ја добие главната улога.

„Слушнав дека сака јас да го работам овој филм и дека не сака никој друг освен мене. Тоа ме заинтригира“, изјавила Хјустон.

„Го одложивме филмот една година затоа што сакавме да ја чекаме. Витни има егзотични особини, има нешто во неа што ги прави сите мажи вљубени“, објаснил Костнер.

Тој беше покрај неа за време на снимањето и ѝ давал актерски совети. И покрај гласините за романса, никогаш не потврди љубовна врска, нагласувајќи дека биле поврзани на поинаков начин.

Љубовен живот без вистинска среќа

Иако на сцената изгледаше самоуверено и стабилно, во приватниот живот немаше среќа во љубовта. Имаше неколку пропаднати врски, меѓу кои со Еди Марфи и со рагбистот Рендал Канингем. Но врската и бракот со Боби Браун го означија почетокот на нејзиниот пад.

Бракот со проблематичниот музичар ѝ донесе лош публицитет. Нејзиното однесување се промени – доцнеше на интервјуа, не ги почитуваше договорите, ослабна драстично. Гласините за употреба на дрога стануваа сѐ погласни.

„Точно е дека сум слаба, но отсекогаш сум била таква и не мислам дека имам анорексија“, изјави таа своевремено.

Во 2001 година потпиша договор вреден 100 милиони долари со издавачката куќа „Ариста“, најголем во историјата на музичката индустрија во тоа време. Но, истата година јавноста беше шокирана од нејзиниот изглед на концертот по повод 30 години кариера на Мајкл Џексон.

Подоцна откри дека поминувала низ тежок период, вклучително и судски спор со татко ѝ.

„Мислев дека му значам, а тој всушност ги сакаше само моите пари“, изјави пејачката.

По години турбуленции, во 2006 година доживеа нервен слом и беше хоспитализирана. Истата година поднесе барање за развод од Боби Браун, а старателството над ќерката Кристина ѝ беше доделено неа.

„Не можев повеќе да ги издржам притисоците… Му го посветив целиот живот, а по десет години сфатив дека тоа повеќе не е обострано“, изјави таа.

Прашања за сексуалноста и траумите

Во документарецот „Витни“ (Whitney) режисерот Кевин Мекдоналд изнесе тврдења дека како дете била сексуално злоупотребувана од роднина. Според сведоштвата, злоупотребата се случувала кога имала меѓу 7 и 9 години, а траумата наводно имала големо влијание врз нејзината зависност.

Во филмот се споменува и нејзината блиска врска со Робин Крафорд, со која живеела како млада. Повеќето соговорници во документарецот сметаат дека Витни била бисексуална.

Ќерката почина на ист начин

Нејзината ќерка, Боби Кристина Браун, во 2015 година беше пронајдена во безживотна состојба во када. Иако беше реанимирана, почина по седум месеци. Официјалната причина за смртта беше давење како последица на предозирање со кокаин и други супстанции, исто како и нејзината мајка.

Наследи богатство проценето на 115 милиони долари, но нејзиниот живот беше обележан со скандали и насилна врска со Ник Гордон, кој подоцна почина од предозирање со хероин.

Најнаградувана во историјата на музиката

Родена во Њу Џерси, како најмладо од трите деца на Џон и Сиси Хјустон, пораснала во музичко семејство. Нејзина тетка беше легендарната Арета Френклин. Првиот настап го имала на 14 години со мајка ѝ.

Првиот албум го објави во 1985 година и веднаш освои Греми. Заврши во Гинисовата книга на рекорди како женски изведувач со најмногу награди – вкупно 415, меѓу кои две Еми, шест Греми, 30 Билборд и 22 Американски музички награди.

„Витни Хјустон беше добра за сите – освен за себе“, велат и денес оние што ја сакале и ја познавале.