Францускиот претседател Емануел Макрон ги осуди „неприфатливите“ пропусти во правосудниот систем по убиството на единаесетгодишно девојче, откако се дозна дека главниот осомничен претходно бил обвинуван за сексуална злоупотреба на деца, објави Еуроњуз.

Девојчето, кое во медиумите е именувано само како Лијана, исчезнало на 29 мај во близина на градот Флеранс, во југозападна Франција, откако последен пат било видено како влегува во автомобил на маж.

По неколкудневно пребарување на околината, истражителите вчера пронашле тело на дете, облечено во иста облека како нејзината, во напуштен силос во блиското село Пикаскје. Формалната идентификација е во тек.

Четириесет и едногодишен татко на две деца, чија ќерка била училишна другарка на Лијана, е приведен како главен осомничен.

Се дознало дека тој претходно двапати бил формално обвинет за силување дете, но истрагите биле или прекинати или заглавени.

„Јасно е дека имало нефункционалност“, рече Макрон во Црна Гора, каде што присуствуваше на европски самит. „Тоа е неприфатливо“.

Премиерот Себастијан Лекорни на итен состанок им рекол на министрите за правда, внатрешни работи и буџет дека е „особено шокиран“ од случајот и побарал првичните наоди од административната истрага да му бидат доставени во рок од две недели, соопшти неговиот кабинет.

Министерот за правда Жералд Дарманен, според неговиот тим, во понеделник наутро треба да ги повика сите јавни обвинители во Париз.

Во Пикаскје, каде што било пронајдено телото, градоначалникот Луј Турши за агенцијата Франс прес изјави дека селото е во шок.

„Страшно е. Заедницата е запрепастена, а и јас исто така“, рече тој.

Обвинителката Клеманс Мајер во средата ги наведе претходните пријави против осомничениот.

Во декември 2017 година, мајка пријавила дека нејзината седумнаесетгодишна ќерка била во врска со мажот. Случајот бил затворен во 2018 година, откако девојката изјавила дека дала согласност.

Во јануари 2022 година, обвинет бил дека во 2020 година во својот дом силувал дете помладо од 15 години. Случајот бил отфрлен во 2024 година поради недостиг на докази.

Во трет случај, на 22 август 2025 година, мајката на девојче родено во 2014 година го обвинила дека го силувал нејзиното дете меѓу септември 2024 и мај 2025 година во неговиот дом, рече обвинителката.

Но, полицијата сè уште не го сослушала кога единаесетгодишната Лијана исчезнала девет месеци подоцна.

Голем скандал со злоупотреби на деца во Франција, под истрага се вработени во градинки и училишта