Британскиот премиер Кир Стармер предупреди дека Русија би можела да нападне земја-членка на НАТО во рок од четири години, според проценките на западните разузнавачки служби, пренесе Еуроњуз.

Стармер ја даде оваа изјава денеска, најавувајќи дека неговата влада ќе го објави долго одложуваниот план за инвестиции во одбраната пред следниот самит на НАТО.

„Нашата разузнавачка проценка, како и проценката на други земји во НАТО, е дека би можело да има напад од Русија врз НАТО уште во 2030 година“, изјави Стармер.

„Затоа можете да ја видите итноста и приоритетот што сега ги даваме на ова прашање“, додаде тој за време на посетата на производител на дронови во југозападна Англија.

Ова се поклопува со слични рокови што претходно ги споменаа и други европски лидери, како и генералниот секретар на НАТО, Марк Руте, кој во декември предупреди дека Русија „би можела да биде подготвена да употреби воена сила против НАТО во рок од пет години“.

Стармер вети дека ќе ги зголеми трошоците за одбрана на 2,5 отсто од бруто домашниот производ од следната година, а потоа на 3 отсто во следниот парламентарен мандат.

Десетгодишниот план за инвестиции во одбраната, кој следи по ревизијата на британските одбранбени капацитети, требаше да биде објавен кон крајот на минатата година, но сè уште не е претставен.

Стармер најави дека планот ќе биде објавен пред самитот на НАТО во Турција, кој почнува на 7 јули.

Британските медиуми објавија дека планот бил одложен поради несогласувања меѓу Министерството за финансии и други ресори околу трошоците. Стармер, сепак, пред новинарите инсистираше дека тој ќе биде „целосно финансиран“.

Претходно, британскиот воен началник предупреди дека земјата мора да ја зајакне својата одбрана како одговор на заканите од Русија, која ја нападна Украина пред повеќе од четири години.

„Во мојата 35-годишна кариера, ова е најопасниот период што го паметам“, изјави главниот маршал на воздухопловството Ричард Најтон за Би-би-си.

„Како последица на тоа, важно е да ги зајакнеме капацитетите и подготвеноста на нашите вооружени сили, заедно со нашите сојузници, за да ги одвратиме нашите противници од неразумен потег“, додаде тој.

Американскиот претседател Доналд Трамп повеќепати ги повика земјите од НАТО да трошат повеќе за одбрана и да станат помалку зависни од Вашингтон за својата безбедност.

Зошто би го нападнале НАТО, тоа се глупости, Русија е спремна за мир со Украина, тврди Путин