Објавени се имињата на трите сестри кои починаа во морето кај Брајтон. Џејн Адеторо (36), Кристина Волтер (32) и Ребека Волтер (31), кои живееле во западен Лондон, биле пронајдени мртви минатата среда рано наутро. Нивниот татко Џозеф се прости од ќерките со трогателна порака, додека полицијата продолжува со истрагата за причините за нивната смрт, пишува ЛБЦ.

„Болката е неподнослива“

„Денес, со срце исполнето со тага и љубов, се простувам од моите сакани ќерки – Џејн, Кристина и Беки – чии животи трагично беа прекинати прерано. Ниту еден збор не може вистински да ја опише болката од загубата на три ќерки во нивната животна сила. Џејн, Кристина и Беки беа повеќе од ќерки за мене – тие беа мојата радост, мојата сила и прекрасната светлина што го исполнуваше нашето семејство со среќа и љубов“, напишал таткото во порака до јавноста.

„Секоја од вас беше единствена и скапоцена на свој начин, додал тој.

„Вашите насмевки ги разубавуваа и најмрачните денови, вашата смеа носеше утеха, а вашето присуство го правеше животот повреден. Иако вашето време на земјата беше кратко, трагата што ја оставивте засекогаш ќе остане во нашите срца“, додал тој, оддавајќи ѝ почит на секоја ќерка поединечно.

Полицијата бара помош

Итните служби биле повикани на плажата во средата, 13 мај, околу 5:45 часот наутро поради пријава за лице во опасност, по што телата на сестрите биле извлечени од морето. Детективите сè уште утврдуваат како сестрите се нашле во водата, но засега нема докази што би укажувале на кривично дело или вмешаност на трети лица.

Истражителите прегледале стотици часови снимки од надзорни камери и разговарале со станари и сопственици на деловни простории во близина на плажата за да го реконструираат движењето на жените. Главниот надзорник Адам Хејс, командант на дивизијата за Брајтон и Хоув, ги повика сите што имаат какви било информации да се јават во полиција.

Особено се заинтересирани да разговараат со сите што можеби ги виделе трите жени во подрачјето на Мадеира драјв меѓу 22 часот во вторник, 12 мај, и 5:30 часот наутро во среда, 13 мај.

„Сите во полицијата на Сасекс со мислите се со семејството на Џејн, Кристина и Ребека по оваа разорна загуба“, изјави главниот надзорник Хејс. „Знам дека овој настан длабоко влијаеше врз локалната заедница во Брајтон и пошироко и сакам да ја уверам јавноста дека ќе го превртиме секој камен во нашата истрага за точно да разбереме што довело до трагичните настани тоа среда утро. Истрагата ќе продолжи со полн интензитет, а семејството на загинатите ќе биде во центарот на нашите напори. Молам да им се овозможи приватност додека се справуваат со оваа страшна трагедија“, додаде тој.

Теорија на Крајбрежната стража

Една од теориите што ја истражува Крајбрежната стража е дека најмалку една од сестрите влегла во морето од плажата, но наишла на проблеми кога зачекорила од песочниот нанос каде морското дно нагло се спушта во длабочина.

Извор од Крајбрежната стража изјавил за „Дејли мејл“ минатата недела:

„Брегот кај Брајтон стрмно се спушта во длабока вода, а многу луѓе не ја сфаќаат таа опасност. Не мора да одите далеку за да наидете на голем пад, каде од вода до колена одеднаш влегувате во вода до гради. Пливачите многу брзо може да ги повлече повратна струја, а со поместувањето на чакалот под нозете станува тешко да се одржи рамнотежа, особено кога се обидувате да се искачите назад по падината додека ве удираат бранови. Една од теориите што ја разгледува Крајбрежната стража е дека најмалку една од жените влегла во морето да плива, отишла предалеку и ја изненадил наглиот пад“, појаснил изворот.

Голема потрага и шок во заедницата

Во потрагата што била покрената минатата среда наутро учествувале хеликоптер на Крајбрежната стража и спасувачки тимови од Шорем, Њухејвен, Литлхемптон и Бирлинг гап. Биле ангажирани и три спасувачки чамци на Кралската национална спасувачка служба од Сасекс, кои испловиле околу 6 часот наутро.

Бела Сенки од Градскиот совет на Брајтон и Хоув, изјавила дека е „шокирана и длабоко ожалостена“ од трагедијата.

„Моето срце е со пријателите и семејството на овие жени, а во име на Брајтон и Хоув изразувам искрено сочувство“, рече таа.

Крис Ворд, пратеник од Лабуристичката партија за Брајтон Кемптаун и Писхејвен, ја опиша веста како „длабоко трагична и разбирливо многу вознемирувачка за нашата заедница и за сите погодени“.

„Би сакал да им се заблагодарам на нашите итни служби за брзата реакција и тешката работа што продолжуваат да ја извршуваат на местото на настанот“, додаде Ворд.

Три сестри скокнале од деветти кат во Индија откако родителите им ги одзеле телефоните