Министерот за внатрешни работи Панче Тошковски денеска потпиша Меморандум за соработка со градоначалниците на Општина Кисела Вода, Бети Стаменкоска Трајкоска и Општина Илинден, Александар Георгиевски, во кој, меѓу останатите работи, предвидена е и изградба на нови полициски станици во овие две општини.

Со ова, во Илинден за првпат ќе има полициска станица, а во Кисела Вода ќе има нов објект со зголемен капацитет, со што, според Тошковски, ќе се придонесе за зголемено полициско присуство, побрза реакција и повисоко ниво на безбедност за граѓаните.

„Овој Меморандум претставува значаен чекор кон јакнење на институционалната соработка и создавање побезбедна средина за граѓаните. Со изградбата на нови полициски станици директно вложуваме во зголемување на безбедноста, но и во унапредување на квалитетот и достапноста на услугите што Министерството ги обезбедува. Нашата цел е да бидеме поблиску до граѓаните и да одговориме навремено и ефикасно на нивните потреби“, истакна министерот Тошковски.