Американскиот актер и режисер Тимоти Басфилд (68) се соочува со ново обвинение за сексуална злоупотреба, кое се однесува на инцидент што, според жалбата, се случил пред неколку години во Сакраменто, Калифорнија, во кој учествувало девојче кое во тоа време имало 16 години, пишува „Ен-би-си њуз“.

Патем, Басфилд се предал на полицијата во Албукерке на 13 јануари, откако неколку дена претходно бил издаден налог за негово апсење. Истиот ден, тој бил обвинет за две точки за кривичен сексуален контакт со малолетник и една точка за злоупотреба на дете. Обвинителите побарале тој да остане во притвор до почетокот на судењето.

Во барањето за притвор, поднесено на 14 јануари, се споменува и нова жалба поднесена до полицијата од Колин Свифт, таткото на втората наводна жртва. Според документот, Свифт ѝ кажал на полицијата дека Басфилд наводно сексуално ја нападнал неговата ќерка за време на аудиција во театарот „Б Стрит“.

„За време на аудиција во театарот ‘Б Стрит’, 16-годишната девојка изјавила дека Басфилд ја бакнал, ги ставил рацете во нејзините панталони и ги допирал нејзините интимни делови“, се наведува во обвинението.

Во истиот документ се наведува дека Басфилд наводно го молел семејството да не го пријавува случајот во полиција ако му дозволат да оди на терапија. Според судските записи, Свифт е психотерапевт по професија и во тоа време мислел дека тоа е најдоброто што може да го направи.

Басфилд е основач на театарот „Б Стрит“, кој го основал во 1986 година под името „Театар за деца, Инк“.

Ве потсетуваме дека, покрај овој извештај, Басфилд е обвинет и за нелегално сексуално однесување кон две момчиња, 11-годишни близнаци, чиј идентитет не е објавен.

Според налогот за апсење издаден на 9 јануари, родителите на момчињата рекле дека нивните синови го запознале Басфилд на снимањето на серијата „Чистачката“ на ФОКС, каде што Басфилд работел како режисер.

Уште еден скандал во Холивуд: Издаден налог за апсење на познатиот актер Тимоти Басфилд поради сексуална злоупотреба на деца