Тим-билдинг во хотел со четири ѕвездички – само по потреба: Владата тврди дека обуките се редовна пракса секоја година
Од Владата велат дека договорот е сукцесивен, без обврска обуките да се реализираат доколку нема реална потреба и интерес, а и дека станува збор за редовна годишна набавка. Минатата година набавката не се реализирала, тврдат оттаму, додека, пак, претходните години вакви обуки се предвидувале и се спроведувале.
Деновиве во медиумите беше објавено дека Генералниот секретаријат на Владата планира да потроши околу 80.000 евра за тридневни тим-билдинзи и за обуки за административни службеници во Охрид, Берово и во Струмица.
Препорачано
Според објавениот оглас на Бирото за јавни набавки, обуките се наменети за вработени од повеќе области – канцелариско и архивско работење, односи со јавноста, јавни набавки, финансии и ревизија, како и дигитални вештини со основи на вештачка интелигенција.
Предвидени се седум групи од по 15–25 службеници, а набавката вклучува сместување во хотели со минимум 4 ѕвездички, два полни пансиона, превоз со туристички автобуси од „Илинденска“ до хотелите и еднокреветни соби. Проценетата вредност на набавката е околу 5 милиони денари.
Од Владата за „Слободен печат“ велат дека „објавената вест изминатите денови е манипулативна и неточна, не станува збор за каков било тим-билдинг, туку за редовна јавна набавка“.
„Обуките за административни службеници се во функција на континуирано стручно усовршување на вработените, како и нивно професионално надградување и реализирање во работниот процес во најважните области: управување со човечки ресурси, јавни набавки, канцелариско и архивско работење, финансии, сметководство и ревизија, односи со јавност, протокол и преведување, дигитализација и дигитални вештини за административни службеници со основи на вештачка интелигенција, примена на закони и на општа управна постапка, управни спорови и работни спорови, заштита на лични податоци,“ велат оттаму.
Од Владата додаваат дека договорот е сукцесивен, без обврска обуките да се реализираат доколку нема реална потреба и интерес, а и дека станува збор за редовна годишна набавка. Минатата година набавката не се реализирала, велат, додека, пак, претходните години вакви обуки се предвидувале и се спроведувале.
Но, од Владата не одговорија конкретно како ќе се мери ефектот од обуките врз работата на администрацијата, ниту, пак, зошто критериумот за избор на изведувач е исклучиво најниската цена, без бодирање на квалитетот на програмите и на предавачите.
Не добивме одговор ниту зошто обуките мора да се одржуваат во хотели со 4 ѕвездички и надвор од Скопје.
