Селекторот на хрватската ракометна репрезентација, Дагур Сигурдсон, денеска во Загреб го означи почетокот на завршните подготовки за Европското првенство, кое од 15 јануари до 1 февруари ќе се одржи во Шведска, Данска и Норвешка.

Непријатна вест за хрватскиот национален тим е сигурното отсуство на еден од најважните играчи, Марин Шипиќ, кој поради повреда нема да настапи на континенталниот шампионат. Сигурдсон на списокот повика 22 ракометари, двајца повеќе од дозволените за турнирот, но веќе е јасно дека искусниот кружен напаѓач нема да се најде меѓу патниците за Европското првенство.

Шипиќ беше еден од клучните играчи на минатогодишното Светско првенство и херој во победата над Унгарија, но повредата на коленото се покажа како сериозна и го оддалечи од теренот подолго од очекуваното.

„Шипиќ е надвор од комбинација. Шансите да заигра се минимални. Рехабилитацијата оди многу бавно и не гледам реална можност подоцна да ни се приклучи. Жал ми е, но мораме да се приспособиме и да продолжиме понатаму“, изјави Сигурдсон.

Селекторот нагласи дека во преостанатиот период акцентот ќе биде ставен на воспоставување подобра рамнотежа меѓу нападот и одбраната, како и на стабилизирање на играта во сите сегменти.

Преземено од: Спорт.ком.мк

Лазаров пред ЕП 2026: Во спортот постојат изненадувања, но треба да се биде реален