Вчера околу 11:25 часот на неасфалтираниот пат помеѓу Привлака и Винковци, Хрватска, 63-годишен возач на автомобил со српски национални ознаки ја изгубил контролата врз возилото поради несоодветна брзина по излегувањето од кривината. Автомобилот скршнал и преминал на спротивната сообраќајна лента, објавија хрватските и српските медиуми..

Во тој момент, од спротивната насока се приближувал патнички автомобил со ѓаковски регистарски таблички, управуван од 44-годишен маж.

Дошло до фронтален судир, а силата на ударот била толку голема што автомобилот со српски таблички се распаднал, при што предниот и задниот дел од возилото се одвоиле.

Во несреќата тешко повредени се 63-годишниот возач и едно дете, додека 44-годишниот возач и тројца патници од неговото возило – 42-годишна жена, 63-годишна жена и дете – се здобиле со полесни повреди.

Против 63-годишникот е поднесена кривична пријава до надлежниот државен обвинител за предизвикување сообраќајна несреќа.