По долгото исчекување, Барселона конечно се враќа на својот матичен стадион.

Фудбалскиот клуб Барселона овој викенд ќе игра на „Камп Ноу“ за првпат по 28 мај 2023 година. Голема вест и за клубот и за навивачите, кои ќе ги исполнат расположливите места на обновениот стадион во дуелот од Ла Лига против Атлетик Билбао. На трибините се очекуваат околу 45.000 гледачи.

По официјалната потврда дека стадионот е подготвен да прими публика, стигна и уште една важна информација – овој пат од УЕФА.

Европската фудбалска федерација направи исклучок и ѝ дозволи на Барселона да ги префрли своите европски натпревари назад на „Камп Ноу“. Каталонците досега ги играа домашните средби од Лигата на шампионите на Олимпискиот стадион „Монжуик“, но побараа дозвола од УЕФА поради доцнењето на градската дозвола за повторно отворање на нивниот стадион.

Со позитивниот одговор од Нион, Барселона на 9 декември ќе го одигра својот натпревар од ЛШ против Ајнтрахт Франкфурт на официјално „Спотифај Камп Ноу“.