Активиран е Кризниот штаб за постапување во зимски услови, кој постојано ја следи состојбата на терен и ја координира работата на сите служби, информираа од Општина Гази Баба.

Во текот на изминатата ноќ на локалните улици и патишта било фрлано сол и ризла, при што посебно внимание е посветено на повисоките населени места од Црешево, па сѐ до Раштак, каде постои поголем ризик од замрзнување на коловозите и наталожување  снег.

Механизацијата и екипите се постојано на терен, со јасна задача да се обезбеди безбедно и непречено движење за сите учесници во сообраќајот. Безбедноста по животот и здравјето на граѓаните е на прво место и токму затоа сите активности се спроведуваат превентивно и навремено – вели градоначалникот Бобан Стефковски кој додава дека ја дочекале зимата целосно подготвени, со обезбедена механизација, материјали и човечки ресурси.

Од Општината апелираат до граѓаните за внимателно движење и почитување на препораките.